A Asociación Párkinson Galicia-Coruña continúa fortalecendo a súa atención ás persoas con enfermidade de Parkinson a través do Programa de Atención Especializada para persoas con discapacidade, unha iniciativa que permite ofrecer unha intervención máis próxima, personalizada e centrada na persoa.
Este programa é posible grazas ao cofinanciamento da Xunta de Galicia, con cargo aos fondos do 0,7 % do IRPF da X Solidaria, xestionados por COGAMI, e ao compromiso das persoas contribuíntes que marcan esta opción na súa declaración da renda. Un xesto sinxelo que se traduce en recursos reais para mellorar a calidade de vida das persoas con párkinson e das súas familias.
Atención integral para persoas con enfermidade de Parkinson
No marco deste proxecto, a Asociación reforzou de maneira significativa as sesións individuais nos seus principais servizos terapéuticos: fisioterapia, logopedia, neuropsicoloxía e traballo social. Estes ámbitos resultan fundamentais para abordar tanto os síntomas motores como os non motores da enfermidade, así como para favorecer a autonomía persoal e o benestar físico, cognitivo, emocional e social das persoas usuarias.
A través dunha atención máis continuada e adaptada ás necesidades de cada persoa, o programa permite realizar intervencións máis axustadas á evolución da enfermidade, garantindo un acompañamento profesional ao longo de todo o proceso.
Un modelo de atención centrado na persoa
O Programa de Atención Especializada para persoas con discapacidade contribúe á consolidación dun modelo de atención centrado na persoa, no que se prioriza a calidade da intervención, a personalización dos apoios e a coordinación entre os distintos perfís profesionais.
Desde a Asociación Párkinson Galicia-Coruña destacan a importancia deste tipo de iniciativas e queren expresar o seu agradecemento á Xunta de Galicia, a COGAMI e a todas as persoas que marcan a X Solidaria na súa declaración da renda. Grazas a este compromiso colectivo, é posible seguir ofrecendo unha atención especializada que marca a diferenza no día a día das persoas con párkinson e das súas familias.